मै छोरी सुन्दरी

राम्रो देखिन रहर कसलाई हुँदैन र ? केटाकेटी हुन् या तन्नेरी, अधबैंशे हुन् या बूढापाका सबैको चाहना हुन्छ आकर्षक देखिने । किशोर-किशोरीमा यो रहर अलि बढी हुन्छ । बाटो हिँड्दा होस् या भोजभतेरमा सामेल हुँदा, चाडपर्वमा रमाउँदा होस् वा डेटिङ जाँदा, जुनसुकै बेला अरूको नजर परोस्, तारिफका लहर चलुन् भन्ने हाम्रो चाहना हुन्छ । बजारमा विभिन्न किसिमका शृंगार सामग्रीदेखि लत्ताकपडासम्म भित्रिएका छन् । नयाँ चिज आयो कि जिद्घी गरेरै भएपनि किनेर अथवा किनाएरै छाड्ने युवतीको बानी हुन्छ । त्यो चिज उपयोगी होस् या नहोस, हामी त्यसतर्फ विचार पुर्‍याउँदैनौं । नारी पहिरनकै कुरा गरौं न- सुन्दरी देखिने होडमा हामी कति नाङ्गएिका छौं ? छोप्नुपर्ने अङ्ग आधुनिकता र स्वतन्त्रताका नाउँमा देखाएर हिँड्नु कहाँको सुन्दरता हो ? बाटोघाटोमा हिंड्दा एक नारीको रूप देखेर अर्की नारीले शिर निहुराउनुपर्ने भइसकेको छ । आधा शरीर नढाक्ने लुगा लगाएर हिँड्दा चर्को घामले छालामा पर्ने असर त छँदैछ अर्कोतिर यौन शोषणको सम्भावना पनि रहन्छ । कहिलेकाहीँ बलात्कारसम्म हुने गर्छ । विडम्बना ! हामी नारीलाई यसको अन्दाजै हुँदैन र दोषजति पुरुषलाई थोपर्छौं । उत्ताउलो हुँदै अर्धनग्न भएर हिंड्ने हामी, केटामा कामुकता पैदा गरी जिस्काउने र नराम्रो सोच विकास गर्ने वातावरण बनाउने पनि हामी र केही भएमा सुरक्षित भइएन, स्वतन्त्रता पाइएन, पुरुषले नारीको सम्मान गरेनन् भन्ने पनि हामी ? जब हामी आफैं समस्या उत्पन्न गर्छौं र शरीरलाई आफैं जोखिममा पार्छौं भने हाम्रो सुरक्षा कसले गर्छ ? अब भन्नुहोस् ! दोष पुरुषको कि महिलाको ? यौन शोषण पुरुषबाट मात्र होइन नारीबाट पुरुषमा पनि हुने गर्छ । यो प्रत्येक पाइलामा भइरहेको हुन सक्छ कसैसँग बोल्दा, जिस्कँदा, स्पर्स हुँदा जुनसुकै बेला । आफू सचेत हुनुपर्छ । लुगा त्यस्तो लगाउनुस् जसबाट सुन्दरता र सुरक्षा दुवै मिलोस् । उत्ताउलो पाराले भड्किलो फेसन गरेर हिँड्नु खतराको घन्टी बजाउनुजत्तिकै हो । तपाईंलाई आफू सुन्दर देखिएको भान त होला तर त्यसको परिणाम के हुन सक्छ त्यो विचार गर्नुस् है । आधुनिकतालाई पछ्याउँदा आफ्नो संस्कृति र परिवेश ख्याल गर्नुपर्छ । यसो भनेर गुन्युचोलीे र फरिया लगाई हिँड्नुस् भन्न खोजेकी होइन । बजारिया फेसन र पश्चिमी सिनेमाको नक्कल गरेर हिँड्नु आफ्नो जीउज्यानको खतरा मोल्नु हो । दुई घन्टे सिनेमा र लामो जिन्दगीमा निकै भिन्नता छ, हैन र ?- निर्मला रेग्मीकेवलपुर- १, धादिङहालः गैरीधारा, काठमाडौं